МУЗЫКАЛОН КЪОРД «МОНЗÆЛ» ÆНТЫСТДЖЫНÆЙ КÆНЫ ФЫЦЦАГ КЪАХДЗÆФТÆ
Музыкалон къорд «Монзæл» æнтыстджынæй кæны фыццаг къахдзæфтæ. 4 курдиатджын музыканты – Елхъанаты Светланæ, Бесаты Данæ, Тедеты Иринæ æмæ Ольга Стенина архайынц алыхуызон инстрементты хъæлæстæ баиу кæныныл. Сæ музыкæ у фыццаджыдæр ирон, уыимæ сæ репертуары ис классикæ, адæмон, стæй сæхи авторон уацмыстæ дæр.
Къорд «Монзæл»-ы репертуарæй алы уацмыс дæр у стыр куысты фæстиуæг. Æмæ кæд фортепиано æмæ скрипкæ иумæ арæх æмбæлынц, уæд ирон фæндыр æмæ гитара иумæ цæгъдгæйæ, стæм хатт фенæн ис. Уыимæ музыкæ рауайы тынг зæрдæмæдзæугæ. Адæмон æмæ классикон музыкæ, авторон уацмыстæ ирон поэтты æмдзывгæтимæ. Нырыккон хуызы сæ саразынц æмæ аивадуарзджыты семæ зонæ кæнынц Елхъанаты Светланæ, Бесаты Данæ, Тедеты Иринæ æмæ Ольга Стенина.
Адæмон инструментты паддзахадон национ оркестры дирижер Елхъанаты Светланæйæн къорды кусын ног хъуыддаг нæу. Уыдис трио «Фæндыры» фæндырдзæгъдæг Гуысауты Зæлинæимæ æмæ Дзуццаты Сосланимæ. Фæлæ йæм ацы къорды архайын, йæхи ныхæстæм гæсгæ, тынг цымыдисаг кæсы. Ирон фæндыр иннæ музыкалон инструменттимæ цæгъдгæйæ, ног хуызы зæлы.
Елхъанаты Светлана, музыкант: «Инструменттæ дзы алыхуызон кæй сты æмæ дзы бабæттын кæй хъæуы – фортепиано, хъис фæндар классикон, гитарæ, æмæ фæндыримæ, æмæ йæ ногдзинад уый мидæг ис, алы инструментты цагъд куыд спада, иумæйаг цагъд куыд уайой, уымæ гæсгæ у ног, стæй дзы уымæ гæсгæ ис зындзинæдтæ».
Фортепианойы зæлтæ ног хуызы раргом кодта æппæтадæмон конкурсты лауреат Тедеты Иринæ. Къорды архайджытæй иу Ольга Стенина Дзæуджыхъæумæ Рязанæй ссыди. Рагæй архайы ирон музыкæ æмæ зарджытæ парахат кæныныл. Ныридæгæн рауагъта 3 дискы ирон зарджытимæ. Архайы æртыккагыл дæр. Уыимæ ма бацæттæ кодта иу альбом сывæллæттæн дыгурон диалектыл. Скрипкæйыл цæгъды Чайковскийы номыл музыкалон скъолайы ахуыргæнæг, музыкант Бесаты Данæ.
Бесаты Дана, музыкант: «Нырыккон ирон музыкæ, стæй канд ирон музыкæйыл мах нæхи нæ бæттæм, кæд æмæ æндæр адæмты музыкæ нæ зæрдæмæ фæцæуа, уæд уыдон дæр цæгъддзыстæм, кæнæ нæхимæ исты хъуыдытæ æрцæуы, æмæ уæд уыдоныл дæр фæкусæм, фæцæгъдæм. Аивады цæстæй куы кæсай музыкæмæ, уæд уым уæлдай нал вæййы, чи цы бæстæйæ æрбацыдис, чы цы адæмы хаттæй у, чи цавæр культурæйыл хæст у, уый тыххæй æмæ иу æвзагыл дзурæм, музыкæйы æвгазыл. уый у тынг рæсугъд, иумæйаг, иугæнæг æвзаг».
Ахæм къорд саразыны хъуыды фæзынд кинодраматург æмæ кинорежиссер Джусойты Муратмæ. Музыкантты ныхæстæм гæсгæ сын сæйрагдæр у ирон æвзаг æмæ культурæ бахъахъхъæныны куыстмæ се вæрæн бахæссын
