Аҕыйах ахсааннаах хоту дойду дьоно бэйэ тылын үйэтитиигэ туруулаһар
Аҕыйах ахсааннаах хоту дойду дьоно хотугу омуктар тылларын, омук быһыытынан уратыларын, төрүт культураларын, үөскээбит төрүттэрин, историяларын үөрэтэллэр. Маннык, эбээн тылын үөрэтэр оскуола Абый улууһун Майыар национальнай нэһилиэгэр баар.
Майыар орто оскуолатын эбээн кылааһын учууталлара төрөөбүт тылга тапталы иҥэрэр, өбүгэлэрин тылларын хомоҕойдук туттар, харыстыыр, сайыннарар сыаллаах-соруктаах үлэлииллэр. Бу оскуолаҕа эбээн тылын 1991 сыллаахтан үөрэтэллэр. Оҕолор күннээҕи кэпсэтиини, эбээннии суругу-бичиги баһылыыллар. Идэлэригэр бэриниилээх учууталлар төрөөбүт түөлбэ тылларын эйгэтэ кэҥиирин, сайдарын туһугар дьулуһаллар.
Бүгүҥҥү күннээххэ оскуола 74 оҕотуттан 16 эбээн тылын үөрэтэр. Кинилэр төһө да аҕыйах буоллаллар, араас олимпиадаларга, күрэхтэргэ ситиһиилээхтик кытталлар. Ол курдук, соторутааҕыта республиканскай олимпиадаҕа кыттан, кыайан-хотон кэлбит кыргыттар төрөөбүт тылларынан үөрэ-көтө кэпсээтилэр.
Ити курдук, омуктарын уратытын, төрөөбүт тылларын уонна культураларын чөл туруктаах илдьэ сылдьар, ону ыччакка тиэрдэр, сайдар саҕахтарын түстэһэр соруктаах үлэлии-хамсыы, айа-тута сылдьаллар.
